قدیم کیشی لره آللاه رحمت ائله سین کی دیه رلی سؤزلر قویوب گئدیب لر. منجه بوآتا سؤزلری گرک کی قیزیل سو ایله یازیلا و هر یئرده دووارلاردان آسیلا .« کئچی جانی نین هاییندا قصاب پی یین آختاریر» ائله او دیه رلی سؤزلردن بیر اؤزل اؤرنک دیر.جانیم سیزه دئسین کی اؤتن گونلرده بؤلگه میزده یاییلان «ارومیه» هفته لیگینده گؤزومه بیر خبر چارپدی کی واللاه ان دوغروسو بیرطرفدن زارافات کیمی گلدی بیر طرفدن ده گرچک بیر آجی اولای. خبر بئله ایدی : « برپایی جشنواره نمک در دریاچه ارومیه » . بله دوسلار، اورمو گؤلونون چئوره سنیده دوز شنلیگی قورولاجاق. بوخبری، گردشگری و میراث فرهنگی دایره سی نین یار دیمجی سی حسین امامی وئریبدی. اوبئله ایضاح ائدیر کی:
«اورمو گؤلونون چئوره سینده دوز قالیببی نین اوجالیغی بیر متیر- یاریما یئتیریر و بوندان دولایی ائلی یه بیلریک شن و ایلنجه لی تؤرن یاراداق. اوآردی دا بئله سؤیله ییر : اویئردن کی اورمو گؤلو دونیانین ان اؤنملی یاشام محیط لرینین بیریسیی دیر بوندان دولایی اورمو شهری وباشقا شهرلرین سوروملو مودیرلرین امه یی ایله سیلسیله وار شکیل ده ، 40 گون دال با دال بو تؤره نی یاراتماق اولار. بونون لازیمه سی ده مالی جهت دن اعتیبار نظر ده توتماق دیر. او آرتیریر: بوشن تؤره نی باشقا سویوقجول اؤلکه لرده یارانان «بوز» شنلیک تؤره نین دن ایلهام آلینیبدیر . ایمامی بو دانیشیقین سونون دا بئله ایضاح ائدیرکی: بوشنلیک ده ائلیی یه بیلریک ، پیکره چی لره بو ایمکانی یاراداق تا دوز ایله یارانان گؤزل پیکره لری شوشه ایچینده ، خالقیمیزین گؤروشو اوچون شهرلرده تاماشایا قویالار.»
ایندی ایسه سؤیله یه جکسیز یوخاری دا گتیردیغیمیز آتا سؤزو بوقونو ایله نه ایلگی سی واردیر؟ اینانین دوسلار بو دؤولتین بئله بیر سوروملو مودیرلری نین ایشلریندن آدام بیلمیر گولسون یوخسا آغلاسین ، بئله بیر اینسانلارین دانشیق لاری و ایشلریندن آدام آز قالیر ده لی اولسون وسرتینی دام- دووارا چالسین. ائله بو قارداشدان سوروشورام : آخی رحمت لی ین اوغلو اورمو گؤلونون بو گرگین دوروموندا بئله بیر اویون بازلیق لار ندیر؟ قیراق دان باخان آداما نه دییه ر؟ آخی سیزین اؤزونوزدن سورشورام ایه ر گؤره سیز بیر آدامین ، عزیزلریندن بیریسی تهلوکه خسته لیق له ال به یاخادیر و اؤلوم دوروموندا اولان حال دا گه له اونا آدگونو تورة نی قویا ، شن لیک ائدیب چئورسی له جالمان گئده هئچ بئله آداما گولمز سیز؟ هئچ دئمزسیز کیشی آغلین چاشیب؟ آتان اؤلوم حالدا اولان یئرده بئله بیر ایشلر ندیر؟
آی سوروملو قارداش ، ایللر بویودورکی اورمو گؤلو چئشیدلی دولای لارلا نفسینین سون چاغلارینی چکیر، ایشیم یوخ کی قورو ایللیق یا اینسانی دولای لار ، اونون دورومون گرگین لش دیریب و اؤلوم حالینا گتیریبلر، آمما ندن پاخیر باسمیش یارامیزا دوز سپیرسیز؟ بئله بیر دورمدا اصلا"بوشنلی یین نه اویاری وار؟ اوزاقدان باخان لار هئچ دئمزلر کی گؤلون قورماغی و آرادان گئتمه سی ندیر بوشن تؤرن ندیر؟ واللاه یاخشی دئییل اؤزگه لری اؤزونوزه گولدوره سیز! منجه سیزین بو ایشی نیز اورمو گؤلو و هابئله اونون لا ایلگی لی چئشیدلی فاعالیت لر و فاعّال اینسانلار و صنفی یارادیجیل NGO - لارین بوتون فاعالیت لرینی سورغو آلتینا آپارماق و بیرجور آغز اَیری لیک دیر. بونا گؤره کی بو بؤلگه و اونون چئوره سینده اولان بؤلگه لر و بلکه ده یابانچی اؤلکه لرین اولا دوغال ، اولا حیئوان ، اولا اکینچی لیق اولا تارلا و باغ- باخجا لاری و اونلاردان اؤنملی سی ، اینسانلارین یاشام لاری ، اورمو گؤلونون یاشامی نا آسیلی و باغلی دیر. باخمایاراق کی اورمو گؤلونون قوروماسینا قارشی دورماق هر بیر کسین بوینوندا آغیر بیر یوک و بؤیوک گؤرئودی و بیز دئمیریک کی سیز گلین بو دوروما قارشی دورون ، آمما آتابابالاریمیز دئمیش کن ، الدن توتمورسوز سا آن آزی ایاقیمیزدان چکمه یین . منیم سوروملو قارداشیم! ایه ر الینیزدن بیرایش گلمیرسه هئچ اولماسا بو درین یارامیزا دوز سپمه یین. قویون اؤز دردیمیزله قالاق.
سون سؤزوم بودورکی منجه هئچ بیر دویغولو ، وطنین و تورپاغین سئون و اؤزللیک له اورمو گؤلونه ماراغی اولان اینسان ، سیزین بو توخامالی تؤره نینیزه قاتیشمایاجاق هئچ بلکه ده قارشی دورار . اورمو گؤلونون شنلی یی اوزامان اوجامان شکلیده و تام اینسانلارین حوضوری ایله قورولاجاق کی ، ایندی کی تهلوکه لی دوروموندان اوزاقلاشا و ان اؤتن سنه لر کیمی اونون شپه لری و سس لی دالغالاری اورموگؤلونون چئوره سینده اولان جاده لرین قیراغینا ده ییب ، سس له نه. اوزامان تام وجودوموزلا اورموگؤلونون دورد بیر طرفینده شنلیک ائدیب و تؤره ن یارادا جاییق کی ، کؤچن دورنالار باشیمیز اوسته اوچوب و اؤزلرین گؤلون یام – یاشیل و دورو سویونا وروب و بیرده گؤیه قالخالار. بئله بیر زاماندا دئمک اینسانلار اؤز یاشاملاری نین شن تؤرن لری نی قوراجاق لار. بیزیم ان اؤنملی ، ان قوتسال و ان دوغرو دیلک و اورک آرزیمیز اورموگؤلونون اؤلومدن قورتولوشو و یئنی دن دیرچه لیشی و سونسوز یاشاملیغا سالام وئرمه سی دیر . گلین آذربایجانیمیزین اوجامان گلینی اورموگؤلونو قوروماق لا ، قوروماغی نین قارشیسیندا دوراق.
آغلاییر نئیله ییم ؟
اورمو گؤلو سوسوز قالیب آغلاییر
من ده اونون بو حالینا آغلاماییم نئیله ییم؟
گون سینه سین کاباب کیمی داغلاییر
من سینه می او حالینا داغلاماییم نئیله ییم؟
لب تشنه دیر حزین- حزین آغلاییر
دامجی – دامجی گؤز یاشیملا سووارماییم نئیله ییم؟
قول – قانادی سینیق قالیب آغلاییر
یاردیمی یوخ حکیم لری هارایلاییم نئیله ییم؟
اورمو گؤلو کفن گئییب آغلاییر
من اگنیمه قارا گئییم نوحه دئییم نئیله ییم؟
اینسانلارین ظولوموندن آغلاییر
بئله ظولمون قارشیسیندا دایانماییم نئیله ییم؟
دورنالارین حسرتیندن آغلاییر
بوردان کؤچن دورنالاری هارای لاییم نئیله ییم؟
آرخلرین فراغیندا آغلاییر
گؤز یاشیملا آرخلاری دولدورماییم نئیله ییم؟
آزارلانیبدی جان وئریر آغلاییر
دوز شنلی یی توتانلاری دانلاماییم نئیله ییم؟
بیر گول کیمی رنگی سولوب آغلاییر
غوصّه لرین قلم ایله پایلاشماییم نئیله ییم؟
سون نفسین چکیر خئسین آغلاییر
آی اینسانلار گرگین له شیب باغیرماییم نئیله ییم؟