زلزله اوخشاماسی
یئنه بیر فاجیعه آغلاتدی بیزی
غوصّه یه غم دنیزه آتدی بیزی
قانا دؤندردی یانان کؤنلوموزو
خسته لندیردی یامان جیسمی میزی
قارشیلاشدی اولای ایله ائلیمیز
جانلارین وئردی او سویداشلاریمیز
قارا تورپاق دا بوغولدو دیریمیز
یاسا دؤندو ائلیمیز هم دیلیمیز
زلزله گلدی شهر - کندی میزه
تل چؤوور ائتدی ضرر ووردو بیزه
خالقیمیز دوشدو مکدرّ دنیزه
قارا گوندوز – گئجه نی سوندو بیزه
سورگون اولدو نئچه مین عائیله لر
غمه باتدی یاسا دؤندو ننه لر
وار- یوخون الدن آلبیب زلزله لر
ائده بیلمز چارا هئچ بیر دده لر
یاشی کئچمیش آتالار هم آنالار
آنا باغریندا یاتان گول بالالار
بختی باتمیش نه قدر قیز – باجیلار
قارا تورپاقدا ندن یئر آلالار؟
قانا باتدی اهریم ورزقانیم
هریسیم کلیبریم جان جیاریم
هر قاریش تورپاغی کندی دیاریم
خراب اولدو چؤله دؤندو نه واریم !
