گؤزلريم گؤزله يير سنين يولونو
اوره ييم يارالي احواليم سولغون
گؤزلريم ياشلانيب نفسيم دولغون
كؤنولوم توتقون گؤزلريم يورقون
گؤزلريم گؤزله يير سنين يولونو
************************
بوستاندا بير گولم بوداغيم سينيق
يارالي بير قوشام قاناديم سينيق
حسرتدن داغلي يام اوره ييم سينيق
گؤزلريم گؤزله يير سنين يولونو
*************************
دالغالي دنيزده ايتميش گمي يم
طوفاندا داغيلان گئنيش گمي يم
عشقينده بوغولان بيتميش گمي يم
گؤزلريم گؤزله يير سنين يولونو
**************************
غوربت واديسينده اوچان بير قوشام
گولون حسرتينده جوشان بير قوشام
روحو تاپتالانميش قوچاق بيرقوشام
گؤزلريم گؤزله يير سنين يولونو
**************************
گئديبدير نيگاريم اوندان خبر يوخ
جيسميمدن آيريلان جاندان خبر يوخ
سوراغين توتورام حه له خبر يوخ
گؤزلريم گؤزله يير سنين يولونو
**************************
قولاغيم سس ده دير سسين دويماغا
قفس ده قوش كيمي سسين دويماغا
ائله هوس لي يم سسين دويماغا
گؤزلريم گؤزله يير سنين يولونو
***************************
ايسترم نيگارين يولوندا اؤلم
قيمت سيز جانيمي يولوندا وئرم
جانيمي جانينا قوربانليق وئرم
گؤزلريم گؤزله يير سنين يولونو
**************************
اوره ييم تيتره يير ياري گؤرمه غه
چكرم اينتيظار ياري گؤرمه غه
دؤزه رم ياي قيشي ياري گؤرمه غه
گؤزلريم گؤزله يير سنين يولونو
**************************
سئوميشم سئورم جاندان ياري من
ياديمدان چيخارتمام بير آن ياري من
اؤلسم ده اونوتمام يئنه ياري من
گؤزلريم گؤزله يير سنين يولونو
***************************
مجنون تك ليلي نين عشقي خسته سي
فرهاد تك شيرينين سئوگي خسته سي
كرم تك اصلي نين يانان خسته سي
گؤزلريم گؤزله يير سنين يولونو
***************************
عاشيقي معشوقدان آيريلتماق اولماز
آناني بالادان آيريلتماق اولماز
سئوگيني سئوگي دن آيريلتماق اولماز
گؤزلريم گؤزله يير سنين يولونو
***************************
سئومك بير دنيزدير هئچ بير سونو يوخ
سئوگينين ايسته يين عمق و سونو يوخ
محبت دنيزدير اوجو سونو يوخ
گؤزلريم گؤزله يير سنين يولونو
۱۳۹۲/۰۶/۱۲