سن سيز له ميشم
نئچه گوندوز گئجه دير من سنه سن سيزله ميشم
بير اوشاق تك آناسين گؤرمه يه سن سيز له ميشم
ائله اود ووردو بو قان باغريما هيجران الووون
سو تكين آتشي سؤندورمه يه سن سيز له ميشم
سئوگي دير كؤنلومو پروانه كيمي يانديران اود
وورغونام شمع وجوده نئجه سن سيز له ميشم
عشقه بيگانه اولان هاردا بيلر سئوگي ندير
من شيرين عشقينه فرهاد كيمي سن سيز له ميشم
كوي عشقينده گزر كن گؤره رم سيمايين
بير بوداق كؤلگه سي تك من سنه سن سيز له ميشم
گول عوذارين مني مجنون ائله دي سالدي چؤله
ليلي سن سن دلي من باخ نئجه سن سيز له ميشم
سن اوزاق دوشمه كؤنولدن دؤزه بيلمم فراغا
تونگ ده كؤرپه باليق تك سويا سن سيز له ميشم
سون باهار گلسه سولار گوللو چمن لي مئشه لر
گول كيمي بولبوله قارشي نئجه سن سيز له ميشم
گئجه گوندوز دؤزرم تا كي گؤرم بيرده سني
بير دان اولدوز ساياراق آي كيمي سن سيز له ميشم
موتلويام واردي بو دونيادا منيم بيرجه جانيم
قوربانين ائتمه غه باخ گؤر نئجه سن سيز له ميشم