تروريست داعش قوروپو و بارزاني نين تهلوكه لي كاسيب كارليغي

اوچ آی بوندان اؤنجه عراق دا یارانان بؤیوک دهشتلی اولای، ترور اؤلگوسو داعش آدلانان بیر اولای دیر. بو تروریست لر 45 گون عیراقا باسقین ائدیب گیریش ائدندن سونرا اونون جينایت کار لیدر و باشچی سي ابوبکر البغدادی آدیندا اؤزونو دونیایا و اؤزلیک له عیراق خالقینا تانیتدیردی و بیر هفته دن سونرا اؤوزنو تام دونيا موسلمانلاری نين خلیفه سی اعلان ائتدی و اشغال ائتدیگی تورپاقلاری یعنی سوریه و عیراقین بیر قیسمینی اؤزنون خلافت مکانی قرار وئردی. البته بو ایدعانی مصر و سعودی عربستان مفتی لری محکوم ائدیب و شیدّت لی درجه ده قینادیلار. انسانیت و اینسانی حقوقلاردان ذره جه آنلایشی و اينامي اولمايان جینایتکار تروريست لر بو ایکی اوچ آیین ایچنده عاغیلا گلمز جینایت لارا ال وروب ائله بیر جینایتلرکی یازقی یا گیترمه يه ده اینسان اوتانیر . آمما ندنسه بئله بیر ترور اؤلگوسو چوخ راحات جا سوریه دن عیراقا داخیل اولوب و هئچ قاباغی آلمادان ، عیراقین سونّو شهرلرین ، کندلرین و اؤزل لیک له نفت جیل بؤلگه لرینی سورعت له اله کئچیرتدی چوخ آیدین دیر. ندنسه عیراقین کوردستانینا باسقين ائتمه دن بیر قاریش تورپاغیني آلمادان ، عیراقین چوخلو سونّو بؤلگه لرينی آیاقلاری آلتیندا تاپتالادیلار؟ البته داعش یا «شام ، عيراق ايسلامی دؤولتی» آدلانان ترور اؤلگوسونون  بنؤوره سی سوریه نین سونّو اولان بؤلگه سینده قورولدو . دئمك بو بؤلگه سوریه نین ایچه ری اوچ ایل لیک ساواشی نتیجه سینده ايشغال ائديلن و تروريست لرين الینه دوشن بؤلگه دير و  داها بشار اسدین بو بؤلگه یه حاكيميتي يوخدور. داعش - ين ترکیبینده، سوریه و عیراقین رادیکال سونّولری ، بعثی لر ، معدوم صدامین طرفدارلاری و اونون قاچاق اردو قووّه باشچی لاری ، تكفيري لر  و حتی باشقا مملکت لرین رادیکال موسلمانلاری اوجمله دن اینگلیس ، آلمان و فرانسه تابعلرینده اولان وطنداشلاری فعالیت ائدیرلر. بو ترور اؤلگوسونو دستک له ین لر سوریه و عیراق سونّولريندن علاوه خارجی اؤلکه لر اوسیرادان سعودی عربستان اؤلکه سی و صدامین قیزی و باشقا قوروپلاردا دستک له ییرلر. آما ان بؤیوک سورغو بودورکی عیراق کوردوستانی و اونون باشچی سی مسعود بارزانی بو سیاسی آلیش – وئریش ده هانکی بیر رولا مالیک دیر؟ ندنسه داعش قووّ ه لری کوردوستانا يوروش ائتمه دن، چوخ راحات و دایاناقسیز شکلیده، عیراقین بؤلگه لری نی بیر به بیر ايشغال آلتینا آپاردی ؟ ندنسه بیر آی بو جنایت جیل باسقیدان سونرا، مسعود بارزانی عيراق كوردوستانين سركرده سي نين فرماني ايله كوردوستانين حربي قووّه لری ، کرکوک شهرینه باسقین ائدیب و داياناقسيز شكيلده او شهري و چئوره سيني اشغال ائتدی ؟ ندنسه نئچه گون بو تجاوزدان سونرا بارزانی اعلام ائتدی کی ان یاخین زاماندا موستیقیل کوردوستان اؤلکه سی اعلان ائدیله جک دیر؟ بئله نظره گلیر کی مسعود بارزانی داعش ترور اؤلگوسوایله اؤنجه دن بؤیوک بیر معامیله و آلیش – وئریش قونوسونا داخیل اولوب و نه معلوم کی نئچه آی بوندان اؤنجه اونلارین آراسیندا دفعه لر گیزلیجه گؤروشلر و دانیشیقلار اولماییب دیر؟ یوخسا مسعود بارزانی بئله ساده جه بولانديریق سودان بالیق توتابیلمزدی ؛ بونو هر بیر اینسان دوشونور و آنلاییر.
عیراق کوردوستان باشچی سی مسعود بارزانی بیلیردی کی عیراقین یئنی آنایاسا یا اساسی قانون اصول لاريندا قید اولان ماده لر اساسیندا بو حَقّه مالیک دئییلدی کی اؤز دوشونجه سي له کوردوستانی بیر موستقیل اؤلکه قالبینده اعلان ائتسین ، بلکه بیر پارا حوققا و فیرتینا اساسیندا سیاسی اتمسفردن سوء استيفاده ائدركن بئله بیر يانليش و تهلوكه لي ایسته یي طرح و ان دوغروسو كاسيبكارليق ائتدي. باشقا اؤنملي سورغو بودور مه یه ائله همین بو آنایاسا اساسیندا ، عیراقین جومهور رئیس لیک مقامی یا پرزیدنتی کوردلره وئریلمه ییب دیر؟ مه یه اونلارین عیراق پارالیمانیندا ميلّت وکیل لری یوخلاریدی؟ مه یه مرکزی دؤولت تركيبينده نئچه ناظیر ليك یا وزیرليك مقامي اوجومله دن خاریجی ایشلر ناظیرلي یی ، موهاجرت و تيجارت ناظيرلي يي و بير نئچه جومهور رئيسينين يارديمليك (معاونت)مقاملاري کوردلره وئریلمه يیب دیر؟ مه یه ائله آنا یاسا اساسیندا ، کوردوستانین حاکیمیتی فدراتيو شكيلده كوردلرين اؤزلرینه تاپشیریلمايیب دیر ؟ مه یه اؤزلرینه عایید پارلمان، دؤولت ، اجرایی ، قضایی و نظامي حاکمیت لر قورولماییب دیر؟ مه یه اؤز دیللري له یازیب اوخومورلار؟ مه یه اؤزولرینه عایید رادیو، تلويزیا، قزئته ، کولتورل مركزلر و باشقا  چئشیدلی سیاسی – اقتصادی و ... پوئن لره مالیک دئییل لر؟ ندنسه آياقلاریني یورقانلاریندان آرتیق اوزادیب ، کوردوستان آدلانان موستقیل مملکت فیکرینده دیرلر؟ عيراق كوردوستاني هانکی بیر يوکسك و گئنيشلي نظامی ، ايقتصادی ، سیاسی ، سوسیال ، کوتورل و امنيتي دوروما مالیک دیر کی ایسته ییر موستقيل اولوب و يئنی مملکت قورسون ؟ منجه چوخ آيدين دير كي عیراقین ان گرگین و دهشتلی سیاسی – اجتماعی دورموندا ، کوردوستان آدیندا موستقیل مملکت یارانماسی ان بؤیوک تهلوکه لی اولایلارلا قارشیلاناجاقدير و اؤز ایچه ري و چئورسینده ده آغیر اعتراضلارلا قاریشیلاناجاق و ایران اؤلکه سی و اؤزل لیک باتی آذربایجان ، کرمانشاه و ایلام بؤلگه لری ده بعضي اولایلارلا اوز به اوز اولاجاقلار . آما گؤرك اگر بو يانليش و تهلوكه لي دوشونجه يعني کوردوستان اؤلکه سی موستقیل اعلان اولونورسا ائتگيسي داخیلی و چئوره دورومونا نه اولاجاق و هانكي تهلوکه لي اؤنملي حاديثه لر باش وئره بیلر :
1)عیراق کوردوستانیندا ایکی ان گوجلو حزب بو بؤلگونون سیاسي ، اجتماعی ، اقتصادی ، کولتورل ، نظامی و امنيتي حاکمیتینده ان گوجلو و يوكسك سويّه ده رول  اويناييرلار. اتحادیه میهنی کوردوستان جلال طالبانی (بوندان اونجه عيراقين جومهور باشقاني) باشچی لیغی آلتیندا و ايكينجي سي حزب دموکرات کوردوستان ، مسعود بارزانی (كوردوستانين اينديكي رئيسي) لیدرلييي آلتیندا . البته باشقا كيچيك حزب لر او جومله دن ايسلامي حرکت حزبی و باشقا حزب لردن ده بو اقليم ده فاعاليّت ائديرلر و حاكميِت اوزه رينده آز – چوخ نقش لري واردير آما سياسي باخيمدان چوخ ائتگيلي حزبلر ساييلميرلار.  بو ایکی حزبه باخمایاراق کی ایللر بویو بعثي صدام رژیمی نین قارشیسیندا حربي موباريزه ده ايشتيراك ائدیب و چیگین چیگینه صدام لا ساواشدا امکداشلیق ائدیبلر، آمما آمئریکا و خارجی اؤلکه لرین نظامی باسقينليق اساسيندا صدامين حوکومتی دارماداغین اولوب و سقوط ائدن دن سونرا یئنی آنایاسا اساسیندا عيراق حاكميّتي فدراتيو قالبينده اوچ بؤلومه بؤلوندو  کی اونلارين بيري كوردوستان فدراتيو حوكومتي دیر و اونا حوکومت ائتمک بو ايكي پارتي يايا وئريلدي . کوردوستان حاکمیتی بو ایکی حزبین ایشتراکی ایله و البته آمئريكا و اوروپا يارديمي لا باش توتدو و اونون نئجه دولانديريلماسي بو ایکی بؤیوک پارتی یایا تاپشیریلاندی . آما ائله اوزاماندان بري ایندی يه جک چئشيدلي قونولارا رغمن يوزلرجه  قانلی تارتیشمایا و ان دوغروسو ساواشا ال وروب لار و بو ساواشمالار اثرينده یوزلر و مین لر اینسان هرایکی طرفدن اؤز جانلاريني الدن وئریبلر . البته بو نئچه ايلين ايچينده بو ايكي حزب باشچيلاري موستقيل كوردوستان آدلي اؤلكه دوشونجه سينده بير بيرلرينه قارشيديرلار و جلال طالباني اتحاديه ميهني كوردوستانين ليدري بو قونويا اساس قارشيدير و بارزاني نين ترسينه موستقيل كوردوستان يارانماسينين مخاليفي دير و ايسته مير عيراق تجزيه اولونسون ، كوردوستان عيراقدان آيريلسين.  آما بونا باخماياراق اگر محال فرض ده كوردوستان خالقي بویانلیش فیکیره يعني كوردوستانين عيراق دان آيريلماسينا سس وئريرلرسه بئله نظره گلیركي ائله همين بوایکی حزبين باشچی لاری بو اؤلکه نین نئجه حوکومت ائتمه سينده و هابئله قودرتين نئجه بؤلونمه سینده یوکسک سويّه ده قانلي ساواشلار و تارتيشمالارا ال ووراجاقلار و بئله ليك له ایران و باشقا اؤلكه لري ده بو داخیلی ساواش دان ائتگی لنديريب و بؤلگه نی تهلوکه لی دوروملا اوز به اوز ائده جک لر.
2)عیراقین کوردوستانیني ایندیکی دورومون نظرده آلماق لا جمعیت و نفوس باخیمیندان  ان يوخاري فایزی کورد و یوزه ییرمی دن اوتوزا دك تورکمن و ان آز فایزی دا سونّو عرب لر و هابئله آسولار و خریستین لره عاییدیر .  باشقا بیر باخیمدا یوزه یئتمیشی سونّو(كوردلر و عرب لر) ، یوزه ییرمی دن چوخو شیعه (توركمنلر) و یوزه اوچ تا بئشه باشقا دین لره تابع اولان جمعیتی واریدیر . حوقوقي و مدني باخيمدا ان اؤنملي سورغو بودور بارزانی يا هر هانسي بير دؤولت رئيسي نئجه و هانکی بیر شرایطده قودرتی اولاجاق کی کوردلردن علاوه باشقا وطنداشلارين او سیرادان تورکمن خالقينين حوقوقي ايستك لرینی هر بیر ساحه ده يئرينه گتريب و اؤده سين؟ بئله نظره گلیرکی اگر موستقیل کورد اؤلکه سی یارانیرسا، بو قونودا يوكسك تارتیشمالار اوز وئره جک دیر و چوخ دا اوزاق دئييل كي بیر داخیلی ساواشلا قاریشیلاناجاقدیر. بئله قونو شوبهه سیز بوتون منطقه نی تهلوکه لي دوروملا اوز به اوز ائده جک دیر .
3-نئجه کی بوندان اؤنجه ایشاره اولوندو عیراقین سیاسی قودرتی آنایاسا اساسیندا اوچ قروپ آراسیندا بؤلونوب . پرزیدنت یا جمهور رئیسی کوردلره، نخست وزیر يا باش باخانليق يا ناطیرلر صدري شیعه عرب لره و پارلمان لیدری سونّو عرب لره وئریلییدی . فواد معصوم بیر کورد وطنداش اولاراق کئچن گونلرده جلال طالبانی نین یئرینه عیراقین پرزیدنتی عونوانيندا سئچیلدی و نئجه کی یوخاریدا قئید اولوندو بوندان باشقا، نئچه وزیرلردن اوسیردان خارجی ايشلر ناظیرلی یی تجارت و بهداشت يا ساغلامليق ناظيرلي يي و همچنين جومهور رئيسين نئچه يارديمليق مقامي کوردلره وئريبليب دیر و بئله نظره گلیرکی اگر یئنی دولت قورولورسا ائله بو دوروم دوام ائده جک دیر . بوندان باشقا کورد وکیل لرن ده عیراق پارلیمانيندا فعالیت ائدیرلر. اگر کوردستان آدیندا اؤلکه اعلان اولونورسا شوبهه سیز ، بو پوئن لرین هامیسی كسينليك له کوردلردن آلينيب و عيراقين مركزي حاكميّتينه وئريله جك دير و كوردلرين بوندان سونرا عيراقين حاكميّتينده آرتيق نقشي اولماياجاقدير.
4)عیراق کوردوستانین ، موستقیل اؤلکه اعلان اولونمانسی گرچک له شیرسه، عیراقین باشقا بؤلکه لری ده ان آزی ایندیکی داعیش واسیطه سی له اشغال اولونان منطقه ايكينجي بؤلكه اولاجاق كي رسمی سوّیه ده موستقيل اؤلكه اعلان اولوناجاق . البته نئجه کی بوندان اوّل اشاره اولوندو داعیش سرکرده سی ابوبکر البغدادی زورلا و موحاريبه و جينايت ايشلر اساسیندا اشغال ائتدیگی بؤلگه لري اؤز خيلاقت منطقه سی سانیب و موستقیل اؤلکه اعلان ائدیبدیر . گرچه ايه ر عیراقین مرکزی حاکمیّتی نیظامی قووّه لر و خاریجی مملکت لر یاردیمی لا داعیشی دارماداغین ائديب ایشغالچی لاری  ایشغال آلتيندا اولان بؤلکه لردن قاچاق ساليب و بو تورپاقلاري الینه کئچیريرسه ، يئنه ده بئله نظره چارپیرکی قیسسا يا اوزون مودّت ده، بو بؤلکه لرین ساکین لری ايستقلال تاپماغا هر طور چاليشيقلارا و ساواشلارا ال ووراجاقلار و عیراقي ان بؤیوک چتین لیک لرله اوز به اوز ائده جك لر . چونكو عيراق مركزي حاكميّتي و بو بؤلكه لرين آراسيندا درين و تاريخي ايختلافلار و تارتيشمالار وار . بئله لیک له کوردوستانین موستقیل اولونماسی ، عیراق حاکمیتیني بؤیوک اولایلارلا  قارشیا ائده جك دير و اونون تیکه تیکه اولونماسی چوخدا اوزاق اولموياجاقدیر. بئله بیر گرگين دوروم منطقه نی و اؤزل لیک له ایران اسلام جومهوریّتنی چئشیدلی چتين لیک و موشكول لرله اوز به اوز ائديب و راحات سیز ائده جك دير.
5) نئجه کی حؤرمت لی اوخوجولار خبرلري واردي دونیانین یوزلر اؤلکه لرین آراسيندا مسعود بارزانی نین بئله بير تهلوکه لی و يانليش فیکیرینه دستک وئریب و اونون يانليش سیاسی ایسته یي گينه  اؤی وئریب و حمایت ائديبدبر و البته اؤزوده بیرايشغالچی اولاراق فلسطين ، لبنان و سوريه خالقي نين تورپاقلاريني زور گوجونه و مين لر اينسانين قانيني تؤكمك اساسيندا اله كئچيريبدي یالنيزجا صهیونیستی اسرائیل رژیمی دیر. بو ایشغالچی و جنایت کار رژیمین ناظیرلر صدری يا باش باخاني ، نتانیاهو کئچن هفته لرده ، نئچه ساهات بارزانی نین یانلیش فیکرینين اعلان اولونماسیندان سونرا ، رسمي سويّه ده اؤز حمایه سيني بيلديردي و کوردوستانین موستقیل اولونماسیندان تام شکلیده مودافعیه ائتدی و اعلان ائتدی کی اگر كوردوستان اؤلكه سي تشكيل تاپيرسا ايلك دؤولت اولاجاق كي بو بؤلکه نی رسمیّته تانیاجاقدیر. البته خاطیرلادیم کی ائله عیراق کوردوستانین حوکومتی و باشچی سي ، اسرائیل غاضب رژیمی ايله چوخ یاخين موناسبتی وار و دفعه لرجه رژیمین بایراغینی کوردوستانين تورپاغیندا و اؤز بایراق لاری نین کناریندا يوخارئيا قالديريبلار. منجه صهیونیستی رژیمینين عیراق کوردوستانین  موستقیل دؤولت قالبینده حمایت ائتمه سینده ايكي اؤنملي هدف آشكار اولونور بيري بودور كي بو رژیم تکجه اؤز منافعيني قوروماق و بو منطقه ده يايماق اوزره بويانليش فیکیردن حمایت ائدیر و آماجي بودور كي كوردوستان حوكومتي اگر بير موستقيل اؤلكه عونوانيندا اولورسا بو غاصب رژيمي متقابلا رسميِّته تاني سين و بئله ليكله اؤزلرينه يولداش قازانسين. ايكينجي هدف بودوركي اگر بارزانی نين يانليش و تهلوكه لي  ایسته یی گرچک له شیرسه  شوبهه سیز کوردوستان تورپاغي ايشغالچی و جينايتكار اسرائیل رژیمینين ، ايران سوريه و عيراق قارشي سيندا ان بؤیوک خلوت حیه طي اولاجاقدير و بو رژیم  اقتصادی ، تجاری، سیاسی و حتی سوسیال قونولاريندا چئشیدلی پوئن لر و امتيازلار وئرمك له اؤز ایاغینی کوردوستاندا مؤحکم له دیب و منطقه نی ان بؤیوک تهلوکه و خطرله اوز به اوز ائده جک دیر. بئله لیک له هرگون بو منطقه اؤزل لیک له بیزیم اؤلکه میز و ان دوغروسو باتی آذربایجان و باشقا استان لار چئشیدلی تهلوکه لر و اولایلار لا قارشی لاناجاقدیر.
بو بئش دلیل و باشقا دلیل لره رغماً ، کوردوستانین مملکت قالبینده اعلان اولونماسی تام منطقه نین و اؤزل لیک له بیزیم و باشقا قونشو مملکت لره قارشی ان بؤیوک تهلوکه و هده سایلیر و بوندان دولایی لازیم دیر هر بیر طریق له بوقونون گرچک لشمه سی نین قاباغی آلینسين و کوردوستان رژیمی نين سرکرد لرینه بو هوشدار وئریلیسین کی اؤز منطق سیز ، قانون سوز و میلّت لر منافع لری له تضاددا اولان فیکیر و دوشونجه لریندن ال گؤتورسون لر و عیراقین تیکه تیکه اولونماسینا سورعت وئرمه سينلر. اگر کوردوستان موستقیل مملکت آدلانیرسا بو آدلانماق دیگر اؤلکه لرده يئرله شن کوردلرين مركزي دؤولت لرله مخاليف اولان حزب لرين سركرده لريني بو  تهلوكه لي قونويا داخيل ائديب و تحریک ائده جک و نه معلوم كي كوردوستانين دؤولت رئيس و حوكومتين ناحيه سيندن بو محاريب حزبلرين سركرده لري چئشيدلي شكيلده اؤزل ليك له سياسي ، حربي و اقتصادي ساحه لرده حمايت اولونماسين و ايران ، توركيه و سوريه نين مركزي حاكميّتي له نئجه يئني موباريزه آپارماق آماجي لا ييغيناجاقلار و قورولتايلار قورولماسين ؟  گرچه بئله بیر مسئله هئچ بیرزامان گرچک لشمه يه جک دیر آمما هر حال دا بؤیوک تهلوکه ساييلر. خاطیرلادیم کی فواد معصوم عیراقین یئنی جومهور رئیسی سئچیلندن سونرا عیراغین آنا یاسا ماده لر اساسیندا قورآن کیتابی نا ال قویار کن آندایچمه  تؤره نینده آند ایچدی و سؤز وئردی کی قویمویاجاق عیراق اؤلکه سی پارچالانسین و تیکه تیکه اولسون .
آما گؤرک بو تهلوکه لی مسئله هاردان و نه زماندان قايناقلانير ؟ اوچ یوز ایل بوندان بری کورد حزب لرین سرکرده لری ایران ، تورکیه ، عیراق و سوریه ده اؤز یانلیش آماج لارینا یئتیرمک اساسیندا قانلی ساواشلارا ال ووروب و اؤز جینایت کار اللرینی مین لرجه تورك اینسانلارین قانینا آلوده ائدیبلر . شیخ عبیداله شمزینی و ياغي اسماييل سمكودان تا ایندیکی عابدوللا اوجالان پ پ ک ترور اؤلگوسونون باشچی سی و دموکرات و کومله باشچی لاری بواوچ یوز ایلین ایچینده موستقیل کوردستان آدلی اؤلکه یارانما  بهانه سی له و البته انگيلیس استعمارچي قيلديغي توطئه يعني خضيب هلال آدلی تورپاق غصب ائله مك توطئه سي گرچک لشمه سینده یوزلر جه قانلی ساواشا ، یوروشه ، تالانا و  باسقی يا ال ورورب و دهشتلی اولای لار یارادیب لار. سولدوز ساواشی 1359 جوایلده ، دموکرات و كومله تروريست لرين طريقي ايله يارانان اولاي اونلارين سون توطئه لري ايدي كي آللاها شوكر اولسون كي سولدوزن قوجامان خالقي و اؤزل ليك له قاراپاپاق دؤيوشچو لري و حاج آغا حسني نين اونودولماز حوضورو و نقشي و فداركارليق لاري لا بئله بير فيرتينا گرچك لشمه دي. 
هر حال دا عیراق کوردوستانین سرکرده سی ، مسعود بارزانی نين بويانليش و تهلوكه لي فیکری منطقه یه و اؤزل لیک له بيزيم اؤلکه میزه بؤیوک تهلوکه و خطرساييلير ، آمما موتلویوق کی بئله بیر یانلیش فیکیر و دوشونجه و تام دوغروسو بئله بیر توطئه هئچ بير زامان گرچک لشمه یه جک دیر و اگر اولورسا دا هئچ بير توطئه يه و فيرتينايا اجازه وئريلمه يه جك دير . آمما بيز تورك لرين بير مثلي واردير كي دئيير : « آیی دئدیغین بد جاناواردی » و لازیمیدی کی هر زامان هوشیار اولاق.