کؤنلوم یارادیر سئوگیلیم آهسته گل آهسته گئت
جیسمیم غم ایله باغلی دیر آهسته گل آهسته گئت
آيلاردي کؤنلوم خسته دیر زنجیر عشقه بسته دیر
قلبيم سنه وابسته دير آهسته گل آهسته گئت
عشق آتشی بریان ائدیب غم کونلومو ویران ائدیب
هجرين مني گيريان ائديب آهسته گل آهسته گئت
سنسیز یازیم قیش دیر منه دونیا بوتون هئشدیر منه
باغریم یانیر سؤنمز حله آهسته گل آهسته گئت
سن سن منیم دان اولدوزوم عشقیم سازیم یازقیم سؤزوم
سن سئوگي يه قوربان اؤزوم آهسته گل آهسته گئت
چوخ داندی سندن آیری یام گول چؤهره يين حيراني يام
اؤز دردیمین گیریانی یام آهسته گل آهسته گئت
اولدو پریشان احوالیم یوخدور بو جیسمیمده حالیم
الدن گئدير جيسميم جانيم آهسته گل آهسته گئت
شوري له قلبيم ايزله يير حسرتله گؤزلر گؤزله يير
كؤنلومده هر آن اؤزله يير آهسته گل آهسته گئت
گونلر گئچير قاشماق دادير ياش ايله نيب آخماقدادير
عؤمروم ده قورتارماق دا دير آهسته گل آهسته گئت
تورپاق قالانسا اوستومه كؤنلوم دولودور حوسنونه
گلسن ده قبريم اوستونه آهسته گل آهسته گئت
۱۳۹۲/۱۱/۰۵