يار حسرتينده ...
هارداسان اي نازلي ياريم جاني قوربانين ائدم
سئوگينه بير جان ندير جانلاري قوربانين ائدم
حسرت ايله كئچدي تام عؤمروم سني گؤرمك ليغه
حاضيرام گؤرمك اوچون من جاني قوربانين ائدم
من سنين حيرانينام بير آن ياديمدان چيخمي سان
اؤزلرم اي جسم و جانيم جاني قوربانين ائدم
گؤزلريم حسرت ده دير گؤرسون مشعشع چؤهره يين
تا كي جان تاپسين بو جانيم جاني قوربانين ائدم
لب لرين لعل شكردير گؤزلرين درياي نور
ايذن وئر بير بوسه يه جانلاري قوربانين ائدم
گؤزلرين مست ائيله يير حيران ائدير هر بير زامان
ايسترم كيپريك لره يوز جاني قوربانين ائدم
شعله عشقين ايشيق سالدي قارانليق كؤنلومه
كؤنلونو شاد ائتمه غه قوي جاني قوربانين ائدم
موتلويام هئچ بير زامان اولمام پشيمان سئوگي دن
سئوگينه جان بسله رم تا جاني قوربانين ائدم