ياغيش ..
ياغيش یاغار اؤلكه لره چؤللري الوان ائيلي ير
گؤي –چمني ، باغ - مئشه ني ، داغلاري خندان ائيلي ير
ايلديريمين گورلو سسي اويانديرار هر نفسي
اودلو شاخان بولوت لاري گؤیوللري شاد ائيلي ير
ياغيش ياغاندا هر زامان داغ اويانير باغ بويانير
بولاق لاري جوشقون ائدر چاي لاري قاينار ائيلي ير
اكينچي لر –بيچين چي لر شادليق ائديب فرح له نر
تانري يا شوكر ائتمك اوچون قوربان كسر پاي ائيلي ير
غم له دولان كؤنول لرين اللري بوش قالان لارين
باغري يارالي دهقانين گؤيلونو چوخ شاد ائيلي ير
سوسوز قالان اورمو گؤلو ، قان آغلايير حزين حزين
ياغيش سنين دامجي لارين دردينه درمان ائيلي ير
ياغيش ياغار گول اوينويار بوداق دا بولبول اوينويار
طراوت ايله دولدورار فضاني مرطوب ائيلي ير
ياغ گينان اي ياغيش سنه واردي نيازيميز حه له
عطشان اولان گؤل –دنيزي سو ايله سيراب ائيلي ير
پاييزدا –يازدا ياغماسا نه ياي اولار نه قيش اولار
ياغيش وجودو اولماسا بهشتي دوزخ ائيلي ير
2/3/1393