آللاهیم بیر یول آچ سن بو سولدوزا/۳۳- جو سولدوز ساواشی نین ایل دؤنومو موناسیبتی ایله

سولدوز شهری قهرمانلار دیاری دیر . ۳۳ ایل بوندان اؤنجه بئله بیر گونلرده سولدوز خالقی ، دمکرات ، کومله و باشقا تروریست حزب و هزلر له بؤیوک موبارزه آپاردیلار و قویمادیلار بیر قرینج آذربایجان تورپاغی تروریست لرین الینه دوشسون. بئله بیر تای سیز موباریزه ده سولدوزون قوچامان اینسانلاری کیشی لی قادین لی تپه دن دیرناغا سیلاح لی کورد تروریستلرله یوکسک و یورولماز موبارزیه آپاریب ، ساواش ائدیب و اوچ گون آمانسیز ساواشدان سونرا آذربایجانین موباریز روحانیسی حاج آغا حسنی و آذربایجانین اوردوسو (۶۴ – جو اورمیه لشکری) بو شهره داخیل اولوب و بوندان دولایی تروریست لرین جانینا قورخو دوشدو بیرچوخ اؤلو و یارالی وئرمک له سولدوزدان قاچقین دوشوب و بو قوتسال تورپاغی خفت له ترک ائتدیلر. البته بو ساواشدا سولدوز خالقی نین نئچه لر نفرلری شهید اولوب و جانلارین و وارلیق لارین الدن وئردیلر آمما اصیل وارلیق لارینی یعنی تورپاغی الدن وئرمه دیلر. تروریستلر بو ساواش دا آغیلا گلمز جینایتلره و سوی قریم لارا ال ووروب بیر نئچه عائیله نی سودامَر اوشاقلاردان تا قوجا کیشی و قادینلاری گولله نین دمیندن کئچیرد دیلر و هابئله چوخلو تورک خالقینی ائوینی و دوکانلاری تالان ائدیب و سونرادا اونلاری دارماداغین ائتدیلر. بئله لیک له شهید دوقتور چمران سولدوزو آذربایجانین دروازه سی آدلاندیردی و ایندی ایسه آذربایجان دروازه سی هئچ بیر زامان کورد ترویستلرین اوزونه آچیلماییب و اونون قوچامان خالقی و اؤزل لیک له قاراپاپاق خالقی جانلاری گئتسه ده ایجازه وئرمی یه جک لر آذربایجانین بیر قرینج تورپاغی دوشمنلرین الینه دوشسون. آمما بیر بئله دایاناقلی موباریزه لردن سونرا و ۳۴ ایل اینقلاب دان سونرا سولدوز بؤلگه سی خالقینین لیاقتی جک هئچ بیر ساحه ده اولسون اقتصادی ، سوسیال یا ایجتماعی ، کولتورل یا فرهنگی ، اکینچی لیک ، صنعت و تجارت و سایره ده اینکیشاف ائتمه ییب و گئنیشلنمه ییب دیر. بوندان دولایی سولدوز بؤیوک بیر درد سینه سین ده داشئییر و هله بیر درمان دا تاپیلماییب دیر. بیر سولدوز یازیچی اولاراق سولدوزن دردلری ایله ایلگیلی بیر شعر سؤیله میشم کی دورنانیوز سایتیندا ایلک دفعه یاییلیر. اومودوم وار ایندیکی ایش اوسته گلن دؤولت بو بؤلگه یه اؤزل باخیشی اولوب و اونون دردلرین حیرمانلارین و یارالارین آرادان قالدیرماق اوچون چئشیدلی پروگراملار یا برنامه لر ایفا ائتدسین . اینانین سولدوز خالقینین بوندان لیاقتی وار بؤیوک و یوکسک موفقیت لره نائیل اولسون.

بو شعر اتحاف اولونور سولدوز و آذربایجان شهیدلرینین قاجامان و قوتسال روح لارینا.

آللاهیم بیر یول آچ سن بو سولدوزا

ائله بیل سولدوزون بختی باغلانیب
اوره یی نیسگیلدن درددن داغلانیب
ایش بیلمز الیندن دالی ساخلانیب
آللاهیم بیر یول آچ سن بو سولدوزا

سولدوزون ندن دیر کدرلی یاشار؟
قوصّه سی – غملری باشلاردان آشار؟
یار اسی – حیرمانی اؤلچودن داشار؟
آللاهیم بیر یول آچ سن بو سولدوزا

سولدوزون داغلاری باشی قارلی دیر
خالقی نین سینه سی کؤنلو داغلی دیر
گؤزلری یاشلی دی قولو باغلی دیر
آللاهیم بیر یول آچ سن بو سولدوزا

سولدوزون هاواسی سویو سؤنوبدور
یام یاشیل چؤللری گؤلو سولوبدور
یارپاغی بوداغی کؤکو دونوبدور
آللاهیم بیر یول آچ سن بو سولدوزا

سولدوزون هایی نا قالان هاردادیر؟
پاسلانان دردینه چاتان هاردادیر؟
الیندن یاپئشان توتان هاردادیر؟
آللاهیم بیر یول آچ سن بو سولدوزا

سولدوزون گئجه سی – گونوغملی دیر
نغمه سی – سازی سؤزو غملی دیر
هم قئشی هم یایی – یازی غملی دیر
آللاهیم بیر یول آچ سن بو سولدوزا

سولدوزون گونلری سیاه قارادیر
روانی خسته دی جیسمی یارادیر
نا نجیب دوشمنلر اولای یارادیر
آللاهیم بیر یول آچ سن بو سولدوزا

سولدوزون ایشیقلی ساهات چاغی یوخ
پارلاقلی گونشی سماسیندا یوخ
موتلولوق ،دیل خوشلوق جیواریندا یوخ
آللاهیم بیر یول آچ سن بو سولدوزا

سولدوزون قیزیل تک یوردو باغی وار
قئیرت لی شرف لی ائل اوشاغی وار
ائشیتمز سوروملو گؤز- قولاغی وار
آللاهیم بیر یول آچ سن بو سولدوزا

سولدوزون غمیندن سولوب سولموشام
نیسگیللی دردیندن سولغون اولموشام
یانیقلی حالیندان اؤزگون اولموشام
آللاهیم بیر یول آچ سن بو سولدوزا

(بو اؤزل يازقي دورنا نيوز http://durnanews.ir سايتيندا ياييليب دير)