تير آيي نين 14-جو گونو قلم گونو آدلانيبدير. بو موناسيبته گؤره سولدوزون مركزي كيتابخاناسيندا تير آيين 20- جي گونونده اؤزل توپلانتي قورولوب و قلم گونونو قوتلاماق دولايي لا سولدوزون چئشيدلي مدني و ادبي كانونلاري و هابئله نواي آذربايجان و تپش قلم نشريه لرين طرفيندن تؤرن يارانميشدي و مني ده بو توپلانتي يا دعوت ائدركن ايسته ميشديلر قلم له ايلگيلي اؤزل دانيشيق آپارام.آشاغيداكي مقاله بو دانيشيغين متني دير كي عينا"درج اولونور:
قلمي یارادان و اونون یازدیغینا آند ایچن اولو تانرینین آدی و یادی لا
بير منم _ بير بو قلم ، بيرده بو ويرانه كؤنول
اوچوموزده گليريك ناله يه با هم گئجه لر
كيمسه بيلمز اورگيم سيرريني دونيادا منيم
ياز قلم دورما كي سنسن منه محرم گئجه لر
اؤنجه دن اورجلوق آیي نین یئتیرمه سینی بوتون موسلمانلارا و اؤزل لیک له بو ایشیقلی توپلانتی دا ایله شن عزیز بؤیوک لریمه تبریک دئییب و اولو تانری دان عیبادت لرییزين قبول اولونماسینی ایستیرم . ایکینجی تبریکيم قلم آدی لا آدلانان تیر آیی نین 14 –جو گونونو بو اؤنم لی و دیرلی گونو سیز قلم ساحه سینده چالیشانلارا اورکدن تبریک دئییرم و آللاهدان ایستیرم گونوگوندن آرتیق قولويوز گوجلو و قلمی يیز کسگین اولسون . اینانین کی بو یئغیناجاق دا اولماق بیر طرف دن منه بؤیوک شرف دیر آمما آیری طرفدن سیزین کیمی سؤز ، ادب ، شعر و علم اوستادلارین قارشی سيندا دانيشماق چتین و زيره كرمانا آپارماقدیر . آمما نئیله ییم کی عزیز و دیه رلی جان دوستوم جناب جعفری سولدوزون ادبی انجمنی نين مودیری منه امر ائتدیلر و من ده بیر شاگیرد اولاراق اونو قبول ائله دیم .
عزیز و دیه رلی قوناقلار من بیر ایرانلی ،آذربایجانلی و اؤزل لیک له سولدوز لو بیرکیچیک یازیچی اولاراق البته اگر یازیچی عونوانينا لیاقتیم اولورسا سیزین قارشئیزدا دیز چؤکوب و باش اییرم . هئج واخت هئج بیر خالقي ، تورپاغي و ديليني سئور اينسان شؤهرته ، اؤدوله و باشقا بیر قازانجی لارا خاطير قلم الینه آلیب و کاغاذی قارالاماز . بیر یازیچی تکجه اینسانلارین دردینی ، باشیناگلن حاقیزلیق لاری ، تاپتالانیمیش حاقلارینی و ایستک لرنی و اؤزل لیک له اینسانی ایستک لرینه ال تاپماسینا و بیر کلمه اینسانین اینسانلیق حاقلارینی گرچک لشدیر مه سینه گؤره قلم الینه آلیر و یازیر . سؤزسوز کی قلم ساحه سینده دانیشماق و اونون بؤيوک نقشینی اینسانلارین یاشایئشلاریندا و سیاسی ، اجتماعی و کوتلوی ساحه لرینده ایضاح ائتمک بئش آلتی ديقه ده اولا بيلمز . قلمین اوقدر شأنی و مقامی یوخاری دیر و ائله بیر دیه ره مالک دیر کی ساعت لر وقت ايستیر بو قونودا دانیشماق . قلم بو اوچ حرفلی کلمه اؤزونه گؤره بؤیوک اؤنمه مالیک دیر . اونون اوقدر قیمتی واردیرکی اولوتانری گؤندردیغی کیتابيندا اونا و یازدیغینا آندایچیر . نئجه کی بیلیرسیز قورآنین بیر آدی دا کیتاب دیر و عرب دیلینده کیتاب به نووره سی کَتَبَ یا یازقی دان قايناقلانیر و یازقی دا قلم له تانینير . اودورکی اولوتانری پیغمبر حضرت لرینه گؤندردیغی کیتابدا قلمه آندایچیر. آندیچمک بو معنادادیر کی قلم بؤیوک قداسته و شرافته مالیک دیر و هر بیر شئی کی چوخ سئویلیر و اؤنم وئریلیر اونا آندایچیلر . آیری بیر يئرده اولوتانری اؤزونو تانیتدیرماغا بئله بویرور : او کس کی قلم له اؤرگشدی «الذي علّم بالقلم» و بونو يئتيريرکی قلم اؤرگتمه غه ، آنلاشدیرماغا جهالت دن قورتارماغا و آنلاییش طرفینه اوزگتیرمه غه یارانیبدیر .
قلمین تاریخینه قيسسا بیر باخيشلا گؤروروق کی قلم اینسانین خیلقه تی له دونیایا گلیب آمما نه اينديكي شكيلده . اينسانلار ياشاملاريندان ايز قويماق قصديله بيرزامان داشلار و آغاجلارلا قايالاردا و داشلي داغلاردا ياشام طرزلريندن يا هر نه كي اونلارا اؤنملي اولوردو ، شكيل لرين چكيرديلر . زامان زامان گئچندن سونرا حرفلر و كلمه لر يارانير و اینسانلار دمیرله و يا قوشلارین قلمه اوخشار قانات لاری لا قایالاردا و اوندان سونرا حیواناتین دریلرینده و ياواش ياواش كاغاذ اوزه رينده یازقی یازیب و چئشیدلی شئی لرین نقشینی چکیب و بیر سند اولاراق ایندیکی کیتابلاردا درج اولونوب و ايضاحلانيبدير . تا اينكه نسيل نسيل قلم شكيلي يكونلاشيب و اينديكي شكيلده اليميزه چاتيبدير . بو باخيشلا بلّي اولور كي قلمین نقشی سؤزدن ایره لی دیر. چونكو قلم له یازیلان اثر يوز ایللر بویو قالارگی اولور و بیر سند سایئلیر . حال بوکی سؤز هئچ بیر واخت قالارگي سند سایئلمير چونکو سؤز دانیشیلیر و او آن یاددان چیخیر گئدیر . بئله ليك له قلم اينسانين وارليغي و هويّتي سايئلير آمما آيري باخيمدان دا قلم اینسانین ایکينجی دیلی سایئلیر چونکو بو قلم ديركي اينسانين کولتور ، ادبیات ، دیل و دینی نی دونیایا تانیتدیریر و بئله ليك له اینسانین عقلی ، معرفتی و دویغو دیلی سایئلیر .
قلمین اوقدر دیه ری واردیرکی اینسانلارین عقلی و ذکاوتی اونلا اؤلچولور نئجه کی حضرت علی (ع) بؤیرور : یازیچی نین عقلی اونون قلمینده دیر . قلم اوقدر اینسانین سیاسی و اجتماعی و کوتلوی دوروموندا نقشی واردیرکی اگر دئسخ دونیادا اینقلابلارین اوزوئرمه سی قلم واسطه سی له اولوب یانلیش سوز دئمه میشیک . چونکو بؤیوک موباریزه آپاران اینسانلار قلم واسیطه سیله سؤزلرین هم خالقا و هم سیتمکارلارا یئتیریبلر و بو یازقیلارین اثرینده اینسانلارین آنلاییشلاري چوخالیب و اونلاری ظالیم لر قارشیسيندا حاقلارین آلماغا گوج وئريب ، بیرلیک یارادیب و سونوچدا ظاليملره غالیب ائديبدير . فرانسه اینقیلابی ،کوبا ، اروپا و باشقا اؤلكه لرده و هابئله ایران ايسلامی اینقیلاب و بو ایللرده ،مصر،تونس،لیبی،سوریه،عراق،افغانستان و سایر اؤلکه لرده یارانان انقیلاب لار ائله قلم واسیطه سی له اولوب . رحمتیک ایمام بیر یئرده دئییر: « او قلمین فایداسی واردیرکی اولوس لاری یوخودان اویاتسین » و بو سؤزون اثريني ائله ايشاره اولونان اؤلکه لرده گؤروروك كي نئجه اولوسلاری یوخودان آییندیریب و اونلاری زای اولان حاقلاری لا تانیش ائدیب و ظاليم لره قارشی اعتیراضا گتیريب و نهايت ده غاليب اولوبلار و يا اولاجاقلار. قلمین قداستی قوتسال لیغی ائله اؤنم لی دیرکی رحمت لیک جلال آل احمد دئییر : « گؤزله یین کی سؤزو بیر تیکه چؤره یه ساتمئیاسیز ؛ روحو جیسمین قوللوقچوسو ائله می یه سیز حتی قارونون دؤولتیني و ثروتینين اندازه سينده وئرسه لرده . اگر ساتیر سیز قولویوزون گوجونوساتین آمما قلمی و کلامی اصلاً و ابدا . شهید دوقتور شریعتی بیريئرده دئییر قلم منیم توتمیم دیر ... آند اولسون قلمه و اونون بوغازیندان تؤكولن قارا قانا ، قوتسال توتمیمي ساتمارام ، اؤلدورمه رم ،اتینی و قانینی یئمه رم ،زور اللره تسلیم ائله مرم ، الیمی قلم ائیله رم ، قلمی الدن وئرمه رم ،گؤزلریمی کور ائله رم ،قولاق لاریمی کار ، آیاقلاریمی سیندیررام ،بارماقلاریمی کسرم ،کؤنلومو پارچالارم ،اوره ییمی اؤلدوررم ،دیلیمی کسرم ،دوداقلاریمی تیکه رم آمما قلمی بیگانه لره وئرمه رم . پولا ساتمارام و یالتاقلار الینه تاپشیرمارام .
داها بوندان آرتیق نه دئمک اولار . قلم اوقدر قیمت لی و دیه رلی دیرکی هئج بیر آزاده اینسان اونو نه پولا ، نه مقاما ، نه مالا ، نه ثروته و نه شؤهرته ساتماز. باخمایاراق کی بعضی اینسانلار تاریخ بویو قلمی عکس صورتیند ایشلدیب لر و قلم واسیطه سی له چوخلو قانلاری ناحق يئره تؤکوب لر حقی ناحق ائیله ییب لر ، باشلاری دار آغاجا آپاریبلار ،عائیله لری داغلاديب لار ، آزاده اینسانلاری دوستاقلارا تاپشیریبلار و اونلاری سورگون و دیدرگین سالیب لار . قلم بئله بیر اينسانلارا چؤرک آغاجی و ترقی نردیوانی اولوب آمما چوخلو اينسانلارین الینده ده قلم اوتجول سیلاح و کسگین بیچاق اولاراق ظالیم لرین قارشی سیندا دایانیب اینسانلارین قوتسال ايستک لرینی يئرینه گتیریب ،اولوسلاری آییندیریب و اونلارین حاقلارینی تانیتدیریب دیر . هر دن ده بئله بیر یازیچی لار اؤزجانلارین بو قوتسال یولدا الدن وئریب لر چوخلو سیخینتیلیق چکیب لر آغیزلاری تیکیلیب ، قولاقلاری کسیلیب ، باشلاری گئدیب و اگر قلم بعضي اينسالارا چؤرك آغاجي اولوبدور ان دو غروسو قلم بئله بير اینسانلارا دا دار آغاجی اولویدور آمما گؤرك بونلارین هانسی خالقیميزين یانیندا دیه ری و قیمتی واردیر؟
آمما ایستردیم بو قيسسا یازقی نین سونوندا نئچه دنه گیله ی لریمی سیز حؤرمتلی عزیزلره و البته سوروملو مودیرلره ایضاح ائدم . آزی 34 ایل ايسلامی اینقیلابدان گئچیر و بو 34 ایلده قلم ساحه سینده چالیشان اینسانلار ایرانین هر بؤلكه سینده و اؤزل لیک له آذربایجان بؤلکه سینده یاخشی قولای اولای و حادثیه لرله اوز به اوز اولوبلار .خصوصا"بو بئش-آلتي ايلين ايچينده آذربایجان یازیچی لاری اؤز ديل ، كولتور و تاريخلري ساحه سينده يازماغا و كيتاب قاليبينده چاپ ائديب يايماغا چوخلو محدوديت لرله اوز به اوز اولوبلار . آمار بونو دئيير من دئميرم . سيز موقايسه ائدين باخين گؤرون ايلده نئچه دنه توركو كيتاب يا تورك ساحه سينده فارسجا يازيلان كيتابلار چئخير و نئچه يوز عونوان و نئچه مين جيلد باشقا ديلده چئخير. بو ندن قايناقلانير ؟ منجه هله ده باخیشلار آذربایجان یازیچی لارینا ، امنیتی باخیش اولوب و تأسوف له اونلارا یابانچی ، تجزیه طلب ، پان تورک و باشقا باشقا آدلار قویوب و اونلارین قلم ساحه سینده چالیشمالارينا قارشی اولوبلار . حال بوكي هركس قلم الينه آلير و اؤز وارليغي ، كولتورو ، ديلي و ادبياتي حاققيندا كيتاب و يا مقاله يازير و يايير بونون هئچ علاقه سي پان لا و تجزيه طلب ليك اولا بيلمز و ايتيفاقا بئله بير اينسانلار تهمت وورانلاردان آرتيق اؤز وطنينه ، تورپاغينا باغلي و آسيليديرلار. ایکينجی گیله ی بودورکی بو بؤیوک لوقده آذربایجاندا نئچه دنه قلم آديلا اولان انجمن فاعالیت ائدیرلر و باشقا اوستانلاردا نئچه انجمن؟ انجمنلرين سايه سينده دير كي يازيچيلار تانينيرلار ، قلم ، كيتاب و يازقي ساحه سينده گئنيشلي ايشلر گؤرونور ، يازي ساحه سينده ماراقلانان اينسانلار فاعاليته باشلاييرلار و يئغاناجاق قورماقلا چئشيدلي برنامه لر ايفا اولونور . آمما تأسوف له بئله بير انجمن لرين سايي بيزيم بؤلكه ده چوخ آزدير . آمما بيلير سيزكي گئچميش ايللرده ایران ، منطقه و استان سوییه سينده تؤره نن فستیوال و چئشيدلي سرگي و یاریشمالاردا آذربايجانين يازارلاري اوستون مقاملارا ال چاتیبلار ، اؤدول لر قازانیب و مقام لار کسب ائدیبلر آمما ندنسه دؤولتي اورقانلارين طرفيندن بئله بير باشاريجي اينسانلارا و قازانديغي مقاملارا اؤنم وئريلمير و باشقا ساحه لرده فعاليت ائدن اينسانلارا فرق قويولور؟ بونون آديني مظلوميت دن سونرا نه قويماق اولار؟
البته سؤز چوخدور و وقتميز آز و بیر طرفدن ده ايسته میرم بوندان آرتيق بو گؤزل مجلیسده سیز عزیزلرین وقتینی توتام . آمما بونا موتلويوق كي یئنی دؤولت ایشنیی باشلئیاندان سونرا جناب روحانی وئردیغی وعده لری كي بيري ده اساسي قانون دا درج اولونان اصل لرين اؤزل ليك له 15 و 19 جو اصل لرين ايجرا اولونماسي دير و يوخاريدا قئيد ائتديغيم سؤزلرله ده ايلگيلي دير ییئرینه گتیرسین و ائله بیر فضا یاراسنین ، چئشیدلی و قانوني ايستكلريميز يئرينه گتيريلسين و ائله بير گون گلسين كي تورك ديلينده مدرسه ، دانيشگاه و فرهنگيستان و ... يارانسين ، ادبي انجمن لر تشكيل تاپسين ، ديل ، كولتور و ادبيات و موسيقي گئنيش لنسين و تورك ديلينده روزنامه ، هفته ليق و آيليق نشريه لر چوخالسين .
عزیز دوستلار ! یازیچی لار ، شاعیرلر ،تدقیقاتچی لار ، تاريخچي لر ، رسام لار ، نقاش لار ،خطاط لار ، عالیم لر و بیر کلمه ده هر بير آزاده اينسان کی قلم له ماراقلانیر ، بیزه و خالقیمیزا بؤیوک بیر معنوی سرمایه سایئلیر بو معنوی سرمایه لری قوروماق گرکدیر . دیه ر وئرمک گرک دیر اونلارین دیریلیق زامانلاريندا گنج لریمیزه و خالقیمیزا تانیتدیرماق گرکدیر .آذربایجانین قاریش قاریش تورپاغي بو معنوی اینسانلاردان دولودور ائله بو سولدوز دا تاریخ بویو ضیالی و زکالی اینسانلار قلم اهلی اولاراق دونیایا گؤز آچیب ، موباریز آپاریب و اؤزلریندن قوچامان ایزلر یارادیب و یادیگار قؤیوب گئدیب لر . نقی خان بورچالي ، شیخ مرتضی رضوی ، سید جلیل ارومی سولدوزي ، یوسف قهرمانپور و علی علمی اوسیرادان دیلار . بونلاردان باشقا سولدوزون دیه رلی یازیچی لاری ایندی بيزيم ايچيميزده یاشاییرلار و خالقیمیزین بوینوندا حاقلاری واردیر و يئری وارکی بو اينسانلاری آلقیشلاییب و دیه ر وئرك. علی خلخالی ، دوقتور پرویز محمدی ، غلامرضا جعفری ، غلام بناوند ، علی جلالی ، مهدی علوی ، ایرج سلیمانزاده ، عیسی یگانه ، علي ابراهيم زاده ، ناصر سعیدی محرم پریزاد ، بلال پورخانه ، وحید اوراز ، زکیه لطفی ، شاهرخ نجفی ، میر هاشم موسوی و اونلار ضیالی شاعيرلر ، بسته كارلار و علمي ساحه سينده چاليشان اینسانلارکی بعضی سی دونيا بعضي سي میلّی سوییه سي و بعضی سي ده آذربایجان بؤلکه سینده بؤيوك مقاملارا مالیک دیرلر ، بيزيم چاغداش معنوی سرمایه لردن سایئليرلار و يئری واردی كي بونلارین هامی سینیدان تشکور ائدیب و ديه ر وئرک .
من يئنه ده سیز عزيزلردن و بوتوپلانتی نی یارادان و اؤزلیک له شاعیره گنج عزیزیمیز خانیم زکیه لطفی سولدوز كيتابخاناسي نين لياقت لي موديري و دیه رلی یازیچی و شاعیر ، جناب جعفری سولدوز ادبي انجمنينين موديري ندن تشکور ائليرم و سيزين قارشئييزدا باش اییب و اولو تانريدان هامئييزا سئوينج ، ساغلام و گؤزل ياشايئش ايستيرم .
